კითხვაზე თუ რა სჭირდება მცენარეს იმისათვის, რომ იცოცხლოს და გაიზარდოს, უმეტესობა  პასუხობს, რომ ესაა:  ნიადაგი, წყალი, ჰაერი და სინათლე. თუმცა, ბევრმა არ იცის, რომ არსებობს მეთოდი, რომლის გამოყენებითაც შეგვიძლია მცენარეები ნიადაგის გარეშე გავზარდოთ!  მცენარეთა გამოზრდის ამ მეთოდს ჰიდროპონიკა ეწოდება. თქვენ თავადაც  შეგიძლიათ სცადოთ და, მაგალითად, საკლასო ოთახში გამოზარდოთ მცენარეები ამ ხერხის გამოყენებით. ეს იქნება თქვენი ექსპერიმენტული პროექტი, რომლის  მიმდინარეობისას, შეძლებთ ერთმანეთს შეადაროთ  ჰიდროპონურად და ჩვეულებრივად მზარდ მცენარეთა  თესლების გაღვივებისა და  ზრდის ტემპი. ექსპერიმენტის დასრულების შემდეგ კი შეგეძლებათ იმსჯელოთ სრულ პროცესზე და გააკეთოთ დასკვნები.