საკითხავი მასალა
ამ ნომერში გთავაზობთ პოზიტიური აღზრდის სისტემას. პოზიტიური მშობლობა გვასწავლის – გვიყვარდეს ბავშვი კრიტიკისა და საყვედურების გარეშე, მივიღოთ მისი პიროვნება ზედმეტი და გადაჭარბებული მოლოდინების გარეშე და დავაფასოთ ის. პოზიტიური აღზრდა ბავშვს ეხმარება საჭირო უნარ-ჩვევების განვითარებაში, პიროვნული მახასიათებლებისა და ღირებულებების ჩამოყალიბებაში. ვინაიდან ურთიერთობა არის ორმხრივი, პოზიტიური მშობლობის სიკეთე აისახება მშობელზეც. ამისათვის მნიშვნელოვანია, რომ დედას/მამას ჰქონდეს მზაობა და განწყობა უკეთესად შეიმეცნოს სხვადასხვა საკითხი ბავშვის დახმარებითა და მონაწილეობით. მასთან ურთიერთობით გადააფასოს საკუთარი დამოკიდებულებები და გააცნობიეროს ბავშვობის დროინდელი კონცეფციები. ენერგია, რომელსაც გასცემს მშობელი, აუცილებლად უბრუნდება მას. დადებითი ემოციური ენერგია იწვევს უკუკავშირს, რომელიც პოზიტიური ემოციებით აღავსებს აღმზრდელსაც.
გთავაზობთ, ასევე, მოსაზრებებს სკოლისა და მშობლის ურთიერთობაზე. ბავშვს აქვს განათლების უფლება, ამიტომ ამ უფლების დაცვისა და ხარისხიანი განათლების მიღებისათვის მნიშვნელოვანია, მასწავლებელთან ერთად, მშობელიც იყოს დაინტერესებული შვილის საგანმანათლებლო საკითხებით, კერძოდ, იცოდეს მისი შვილის ძლიერი და სუსტი მხარეები.
თითოეული სტატია და მთლიანად ჟურნალი ერთ მიზანს ემსახურება – აღვზარდოთ სრულფასოვანი მოქალაქეები, რათა შემდგომ მათ, საკუთარ უფლებებთან ერთად, სხვისი უფლებებიც დაიცვან და, რაც მთავარია, ყოველთვის ახსოვდეთ საკუთარი მოვალეობები.
