საკითხავი მასალა
STEAM – წარმოსახვის ძალა!
ჩვენი ჟურნალის პირველ ნომერში წამოვიწყეთ დისკუსია STEM სწავლების პრინციპებსა და მიდგომებზე. ახალ ნომერში გთავაზობთ საინტერესო STEM აქტივობებს, რომლებიც დაგვეხმარება ამ პრინციპების განხორციელებაში. შეუძლებელია დავაინტერესოთ ბავშვები გაკვეთილზე თუ კლუბებში მათი განწყობისა და მოტივაციის გათავალისწინების გარეშე. რა განასხვავებს STEM აქტივობას საბუნებისმეტყველო საგნების ტიპურ აქტივობებისგან? ბუნებისმეტყველება გვეხმარება გავიაზროთ მოვლენები და კანონები, რომლებიც მოქმედებს სამყაროში სადაც ჩვენ ვცხოვრობთ, დავინახოთ პრობლემები, რომლის წინაშეც დგას სამყარო. STEM აზროვნება იწყება მაშინვე, როცა ამ პრობლემების გადაჭრის გზების ძიებას ვიწყებთ, ვეყრდნობით და ვიყენებთ ჩვენს ცოდნას ქიმიასა და ფიზიკაში, ბიოლოგიასა და ისტორიაში, ნებისმიერ საგანში, რომელსაც ვსწავლობთ სკოლაში. STEM იწყება მაშინ, როცა ვიქცევით ინჟინრებათ და ვქმნით მექანიზმებს, რომლებიც დაგვეხმარება ამ პრობლემების დაძლევაში. STEM იწყება მაშინ, როცა მათემატიკური ინსტრუმენტებით აღჭურვილები ვზომავთ, ვანგარიშობთ და ვეძებთ დამოკიდებულებებს, კვლევის პროცესში აღმოჩენილ მონაცემებს შორის. ჩვენი მოსწავლეების წარმოსახვა არ არის შეზღუდული პირობითობებით და ქმნის საოცარ გეგმებს, ვარაუდობს ახალ გზებს სამყაროს წინაშე მდგარი პრობლემების დასაძლევად. მოსწავლეები ერთად მსჯელობენ და ფიქრობენ, უზიარებენ ერთმანეთს გამოცდილებას და საკუთარ ხედვას, ქმნიან და გამოცდიან, ეშლებათ დაეძებენ ახალ გადაწყვეტას – სწორედ ეს პროცესი არის STEM! თქვენი ყურადღება მინდა მივაქციო ქალბატონ მაია ზიბზიბაძის წერილის მეორე ნაწილს, სადაც კვლევების შედეგებზე დაფუძნებით წარმოდგენილია STEM მასწავლებლის სამოქმედო ჩარჩო. ჩვენი ვალდებულება არის, შევუქმნათ ასეთი სასწავლო და სამუშაო გარემო, დავეხმაროთ წარმოსახვისა და აზრის განვითარებაში, დავეხმაროთ თავისი ხელით შექმნან საკუთარი მომავალი. STEM აქტივობაზე მუშაობა უნდა ახალისებდეს მოსწავლეებს, პრობლემებს არასდროს აქვს გადაწყვეტის მხოლოდ ერთი გზა, იდეების შეჯიბრი ყოველთვის ზრდის ახალ-გაზრდების მოტივაციას. იმედი გვაქვს, რომ ჩვენი აქტივობები გაამდიდრებს და გაახალისებს თქვენს STEM სწავლების პროცესს. წარმატებები!
