საკითხავი მასალა
თანამედროვე მიდგომები სწავლებაში მოსწავლისაგან ითხოვს კრიტიკულ და შემოქმედებით აზროვნებას, დამოუკიდებელი არგუმენტირებული მსჯელობის საფუძველზე ტექსტების ორიგინალურ ინტერპრეტაციებს, კონტექსტური ფაქტორების (ტექსტის შექმნის ეპოქა, ადგილი, კულტურული არეალი, საზოგადოებრივ-პოლიტიკური და სოციოკულტურული რეალიები; ფასეულობები) გააზრებას ნაწარმოებებში... ჩვენს ჟურნალში ავტორთა მიერ შემოთავაზებული წერილები სწორედ ამაში დაეხმარება მოსწავლეებს და მასწავლებლებსაც. ჟურნალში გაჩნდა ახალი რუბრიკა: ცოტა რამ ლიტერატურის თეორიიდან, რომლის აუცილებლობაც მასწავლებლებთან ურთიერთობის ხანგრძლივმა გამოცდილებამ დაგვანახვა. გვერდს ვერც ქართული ენის სწავლების საკითხს ავუვლიდით და ვერც ისეთ აქტუალურ თემას, როგორიცაა ტერმინთშემოქმედება. ეს უკანასკნელი მასწავლებელთა დიდ ნაწილს, რომელიც თუნდაც განათლების სისტემაში ასე მოჭარბებულ უცხოურ ტერმინებს ძნელად იღებს, დააფიქრებს იმაზე, თუ რამ განაპირობა ენაში ამდენი უცხო სიტყვის გაჩენა. ჟურნალის ავკარგიანობას მკითხველი შეაფასებს, ჰოდა ჩვენც ველით თქვენს გამოხმაურებას, რომელიც დიდ სამსახურს გაგვიწევს და გაგვიჩენს განცდას, რომ ამ საქმეში მარტონი არ ვართ.
