საკითხავი მასალა
სწავლება კითხვების დასმით იწყება
– რა უნდა ვიცოდეთ, რისი ცოდნა გვსურს, როგორ შევიძინოთ ეს ცოდნები?
სკოლაც მუდმივი ძიების, მცდელობისა და ზოგჯერ შეცდომების სივრცეა. აქ შესაძლოა, საბოლოო პასუხი ვერ მივიღოთ ჩვენთვის საინტერესო და მნიშვნელოვან კითხვებზე, მაგრამ ვისწავლოთ, როგორ დავსვათ შეკითხვა სწორად.
ჟურნალის ამ ნომერში თავმოყრილი წერილები სწორედ პასუხების ძიების სხვადასხვა გზას გვიჩვენებს. მასწავლებლები, რომლებიც საკუთარ პრაქტიკას აკვირდებიან და აანალიზებენ, ხშირად ცვლიან სწავლების მეთოდებს. თანამედროვე სწავლება მხოლოდ ახალი მასალის ახსნით არ შემოიფარგლება, ის გამოცდილებაა, რომელსაც გაკვეთილების დროს იძენ, რომელიც ზოგჯერ კვლევას ჰგავს, ზოგჯერ – დიალოგს და ზოგჯერ – ფიქრის კულტურას გვასწავლის.
ამ პროცესში განსაკუთრებით მკაფიოდ იკვეთება ერთი რამ – განათლება მხოლოდ ცოდნის დაგროვება არ არის. ის არის ღირებულებების ფორმირება, დამოკიდებულებების ჩამოყალიბება, სამყაროსთან ურთიერთობა. პასუხისმგებლობაა საკუთარი თავის, სხვის და იმ მომავლის წინაშე, რომელსაც ყოველდღე ვქმნით.
ამ სწრაფად ცვალებად სამყაროში, სადაც ტექნოლოგიები სწრაფად ვითარდება, ყველაზე მნიშვნელოვანი მაინც ადამიანის უნარია – იფიქროს, იეჭვოს, გაარჩიოს. შესაძლოა, სწორედ ეს არის თანამედროვე განათლების მთავარი ამოცანა: არა მხოლოდ გვასწავლოს, რა ვიცოდეთ, არამედ გვასწავლოს, როგორ ვიცხოვროთ ცოდნასთან ერთად.
თანამედროვე განათლებაში მნიშვნელოვანი ადგილი უჭირავს ღირებულებით განათლებას. ცოდნა ვერ იქნება სრულყოფილი, თუ ის არ არის დაკავშირებული პასუხისმგებლობასთან, პატივისცემასთან, სამართლიანობასთან და მოქალაქეობრივ ცნობიერებასთან. სწორედ ამ ღირებულებებზე დაფუძნებული განათლება ქმნის საფუძველს საზოგადოების განვითარებისთვის.
ინფორმაციის სიჭარბე და სოციალური რეალობის დინამიკა, მნიშვნელოვნად ზრდის კრიტიკული აზროვნების აუცილებლობას. ამიტომ თანამედროვე განათლების ერთ-ერთი მთავარი ამოცანაა სააზროვნო უნარების განვითარება – გააანალიზონ ინფორმაცია, დასვან კითხვები და ცოდნა პასუხისმგებლობით გამოიყენონ.
ჟურნალის ეს ნომერი აერთიანებს თეორიულ ხედვებს, პრაქტიკულ გამოცდილებასა და სასწავლო რესურსებს. გვინდა, რომ ჟურნალი „მასწავლებელი“ კვლავ დარჩეს სივრცედ, სადაც პროფესიული გამოცდილებები განიხილება და ახალი იდეების საფუძვლად იქცევა.
ეს ნომერი არის მცდელობა, სხვადასხვა კუთხიდან, სხვადასხვა გამოცდილებით შევეხოთ დაგროვილ კითხვებს. შესაძლოა, მკითხველმაც აქ იპოვოს კითხვებზე პასუხები და თავისი საკუთარი შეკითხვაც დასვას.
