შეფასების ინსტრუმენტი განკუთვნილია განვითარების სისტემური მონიტორინგისა და დოკუმენტირებისათვის. იგი ეფუძნება სტრუქტურირებულ მიდგომას და უზრუნველყოფს ბავშვის პროგრესის შეფასებას განვითარების სხვადასხვა სფეროში. ინსტრუმენტი ხელს უწყობს თითოეული ბავშვის ინდივიდუალური განვითარების დინამიკის ანალიზს სასწავლო წლის განმავლობაში, რაც იძლევა მისი განვითარების მთლიანობითი სურათის მიღების შესაძლებლობას.
შეფასების შედეგები გამოიყენება ბავშვის მრავალმხრივ განვითარებაზე ორიენტირებული, ინდივიდუალურად მორგებული საგანმანათლებლო სტრატეგიებისა და გეგმების შემუშავებისთვის. გარდა ამისა, ინსტრუმენტი იძლევა ობიექტურ და გასაგებ ინფორმაციას ბავშვის მიღწევების შესახებ, რაც, შეფასების შედეგების გაზიარებისას, ამარტივებს ბავშვის ოჯახთან ეფექტურ კომუნიკაციას და ხელს უწყობს მშობლების აქტიურ ჩართულობას ბავშვის განვითარების პროცესში. შეფასების შედეგად მიღებული სისტემური მონაცემები ხელს უწყობს პროფესიული გადაწყვეტილებების მიღებას, მათ შორის, სირთულეების ადრეულ იდენტიფიცირებას, დროული ჩარევის დაგეგმვას და, საჭიროების შემთხვევაში, შესაბამის გადამისამართებას. ამავე დროს, ინსტრუმენტი წარმოადგენს ბავშვის განვითარების პორტფოლიოს შექმნისა და დოკუმენტირების მნიშვნელოვან საფუძველს, რომელიც განვითარების პროცესში ასახავს ბავშვის პროგრესს.
შეფასების ინსტრუმენტი შემუშავებულია პროექტის „ინოვაცია, ინკლუზიურობა და ხარისხი - საქართველო I2Q (WB) ფარგლებში“, რომლის მიზანია, ქვეყნის მასშტაბით, ადრეული და სკოლამდელი აღზრდისა და განათლების დაწესებულებების მართვის სისტემის გაუმჯობესება და პროგრამების ხარისხის ამაღლება.
