eTwinning-ის 2025 წლის შემაჯამებელი კონფერენცია: „საბაზისო და სასიცოცხლო უნარები განათლებაში“ მასწავლებელთა პროფესიული განვითარების ეროვნული ცენტრის ინიციატივით გაიმართა პროგრამა eTwinning-ის 2025 წლის შემაჯამებელი კონფერენცია თემაზე: „საბაზისო და სასიცოცხლო უნარები განათლებაში“. კონფერენცია გახსნა და მისასალმებელი სიტყვით მიმართა საქართველოს განათლების, მეცნიერებისა და ახალგაზრდობის მინისტრმა გივი მიქანაძემ, მინისტრის მოადგილე თამარ მახარაშვილმა, მასწავლებელთა პროფესიული განვითარების ეროვნული ცენტრის დირექტორმა ეკატერინე ხუციშვილმა და პროგრამა eTwinning-ის მენეჯერმა ხატია მატკავამ. კონფერენციაში მოწვეული იყვნენ საერთაშორისო ექსპერტები — ანა გილერანი, eTwinning-ის პედაგოგიური მრჩეველი (ცენტრალური მხარდამჭერი სამსახური (CSS), ევროპის სქულნეტი), და ვილტრუდ ვედინგერი, ციურიხის მასწავლებელთა განათლების უნივერსიტეტის პროფესორი, რომლებმაც ღონისძიებაში ონლაინფორმატში მიიღეს მონაწილეობა. კონფერენციაზე მომხსენებლებად წარსდგნენ: ნათია ნაცვლიშვილი (საერთაშორისო ურთიერთობების კონსულტანტი; დემოკრატიული მოქალაქეობის ექსპერტი) და ნატო ინგოროყვა (სოციალურ მეცნიერებათა დოქტორი, მედიაწიგნიერების მკვლევარი, განათლების ციფრული სახლის პროგრამის მენეჯერი (TPDC), ევროპის საბჭოს განათლების პროფესიონალთა არაფორმალური ქსელის საქართველოს წარმომადგენელი). კონფერენცია მოიცავდა სესიებს სხვადასხვა თემატური მიმართულებით, რაც მონაწილეებს აძლევდა შესაძლებლობას, სიღრმისეულად განეხილათ თანამედროვე საგანმანათლებლო ტენდენციები, გაეზიარებინათ გამოცდილება და დაეგეგმათ მათი ინტეგრაცია სასკოლო პრაქტიკაში. კონფერენციის ფარგლებში მოეწყო STEAM მიმართულებით განხორციელებული პროექტების გამოფენა, სადაც წარმოდგენილი იყო eTwinning-ის პროგრამის ფარგლებში შესრულებული ინოვაციური სასკოლო პროექტები. კონფერენცია დასრულდა იმ მასწავლებლების დაჯილდოებით, რომლებიც პროგრამის ფარგლებში მთელი წლის განმავლობაში აქტიურად მუშაობდნენ, იყვნენ არაერთი პროექტის ავტორები და მიღებული ჰქონდათ ევროპული ხარისხის ნიშანი. მათ სერტიფიკატები და სიმბოლური საჩუქრები მასწავლებელთა პროფესიული განვითარების ეროვნული ცენტრის დირექტორმა ეკატერინე ხუციშვილმა გადასცა. კონფერენციაში მონაწილეობდა პროგრამის 150 აქტიური მასწავლებელი და 40 მოსწავლე.