რესურსის შექმნის მიზანი არის ხელი შევუწყოთ ფიზიკის მასწავლებლებს სწავლების პროცესის გაუმჯობესებაში. სასწავლო პროექტებზე მუშაობა ხელს უწყობს მოსწავლეებს დაინახონ საგნის (ფიზიკის) როლი და ადგილი ჩვენს ყოფა-ცხოვრებაში, პრაქტიკაში გამოიყენონ ის ცოდნა, რომელიც შეიძინეს გაკვეთილებზე საგნის შესწავლისას, განივითარონ სხვადასხვა უნარ-ჩვევები. პროექტებზე მუშაობის შემდეგ თვალნათლივ ჩანს მათი მუშაობის შედეგი და ნაყოფი.

მზის კოლექტორი წარმოადგენს მოწყობილობას, რომელიც საშუალებას იძლევა, გამოვიყენოთ მზის ენერგია წყლის გასათბობად. ამ პროექტის განხორციელების დროს მოსწავლეებს შეუძლიათ ააგონ ეს მოწყობილობა, რომელსაც ექნება პრაქტიკული დანიშნულება - მათ შეეძლებათ სკოლის საჭიროებისთვის მიიღონ და გამოიყენონ ცხელი წყალი. გარდა ამისა პროექტზე მუშაობისას მათ მოუწევთ სხვადასხვა საინტერესო აქტივობების ჩატარება, რომელთა შინაარსი ზედმიწევნით არის გაწერილი პროექტის გზამკვლევში. ასევე გაწერილია მზის კოლექტორის ასაგებად საჭირო მასალები და მათი ხარჯები, თუმცა შესაძლებელია სრულად მისი აგება მეორადი მასალებით.  პროექტის გამოყენება შეუძლია ნებისმიერი სკოლის მოსწავლეებს, რომელთაც შეუძლიათ მოარგონ იგი საკუთარი სკოლის გარემოსა და პირობებს.

რესურსი განკუთვნილია როგორც ფიზიკის, ასევე ბუნებისმეტყველების მასწავლებლებისთვის.