მასწავლებელთა პროფესიული განვითარების ეროვნული ცენტრისა და პროგრამა eTwinning-ის მხარდაჭერით ქართულ ენაზე გამოიცა „ევროპის საბჭოს რეკომენდაცია ციფრული მოქალაქეობის შესახებ“ რომელიც განათლების განვითარებისა და ხელშეწყობისკენ არის მიმართული და მიზნად ისახავს ციფრული მოქალაქეობის საკითხების გააქტიურებას.

დღევანდელ, ტექნოლოგიებით მართულ და ინფორმაციით მდიდარ გარემოში, მოქალაქეები ახალი შესაძლებლობებისა და გამოწვევების წინაშე დგებიან, როდესაც ისინი სარგებლობენ საკუთარი უფლებებით, ახორციელებენ საკუთარ პასუხისმგებლობებს და მონაწილეობენ თავიანთი თემის საქმიანობაში, როგორც ციფრული მოქალაქეები. ციფრული სამყარო გვთავაზობს გარემოს, რომელიც უმნიშვნელოვანესია დემოკრატიული პროცესებისა და პრაქტიკის განხორციელებისთვის, მათ შორის, ინფორმაციის გავრცელებისა და ონლაინსივრცეში მისი მართვისთვის. ციფრული სამყარო, სოციალური მედიის საშუალებით, წარმოადგენს მნიშვნელოვან პლატფორმას ინტერკულტურული დიალოგისთვის და, ასევე, ქმნის მოქალაქეების მიერ სოციალური, ეკონომიკური და პოლიტიკური მონაწილეობის უფლებით სარგებლობის დღითიდღე უფრო მყარ კონტექსტს.

ციფრული მოქალაქეობის კომპეტენციები განსაზღვრავს, თუ როგორ ვმოქმედებთ და ვურთიერთობთ ონლაინსივრცეში. აღნიშნული კომპეტენციები მოიცავს ღირებულებებს, დამოკიდებულებებს, უნარებს და ცოდნასა და კრიტიკულ გააზრებას, რაც აუცილებელია მუდმივად განვითარებად ციფრულ სამყაროში პასუხისმგებლობით მოქმედებისათვის და ეს კომპეტენციები გვაძლევს საშუალებას, ვმართოთ ტექნოლოგიები და მოვარგოთ ისინი ჩვენს საჭიროებებს, ნაცვლად იმისა, რომ თავად გავხდეთ ტექნოლოგიებით მართული.

ციფრული მოქალაქეობის შესახებ განათლება მიზნად ისახავს ყველა ასაკის ადამიანის გაძლიერებას, აღნიშნული კომპეტენციების შეძენის გზით, რათა მათ შეძლონ აქტიური მონაწილეობა ციფრულ საზოგადოებაში, დაიცვან თავიანთი მოვალეობები ონლაინსივრცეში, და ხელი შეუწყონ ადამიანის უფლებების, დემოკრატიისა და კანონის უზენაესობის დაცვას ციფრულ გარემოში.