საკითხავი მასალა
გთავაზობთ ჟურნალ „განათლება გლობალური
მოქალაქეობისთვის“ 2024 წლის მეორე ნომერს. მასში წარმოდგენილი სტატიები ეხება ენისა
და მოქალაქეობის, მდგრადი განვითარების, სამშვიდობო განათლების, კეთილდღეობისა და ჯანმრთელობის,
საინფორმაციო ტექნოლოგიების საკითხებს.
დღეს, როდესაც აქტიური მოქალაქის აღზრდა განათლების ერთ-ერთი მნიშვნელოვანი მიზანია, საინტერესოა იმ ხელშემწყობი პირობების გამოვლენა და შესწავლა, რომლებიც განაპირობებენ ამ მიზნის მიღწევას. ენისა და მოქალაქეობის კავშირს ეხება სტატია, რომელშიც ავტორი განსაკუთრებულ ყურადღებას ამახვილებს საგანმანათლებლო კონტექსტზე და მასწავლებლის როლზე მოქალაქის ფორმირებაში.
სამშვიდობო განათლება მიჩნეულია მდგრადი მშვიდობის მიღწევის ერთ-ერთ მძლავრ იარაღად. ჩვენს დროში მან განსაკუთრებული მნიშვნელობა შეიძინა, მიუხედავად იმისა, რომ სამშვიდობო განათლების იდეა ახალი არ არის და სათავეს მე-17 საუკუნიდან იღებს. ვფიქრობთ, მკითხველისთვის არ იქნება ინტერესმოკლებული საქართველოში არსებული მისი პერსპექტივების გაცნობა. მდგრადი განვითარება საზოგადოების ცხოვრებისა და მოღვაწეობის ყველა სფეროს ეხება. თითოეულ მოქალაქეს, საწარმოს თუ ქვეყანას დიდი პასუხისმგებლობა აკისრია მისი მიზნების მიღწევაში. ეკოლოგიური პრობლემების გადაჭრას ემსახურება ახალი მიდგომები, ხედვები და ქმედებები. ტანსაცმლის წარმოების ახალ ტენდენციას გვაცნობს ავტორი და მდგრადი მოდის არჩევას სთავაზობს მკითხველს.
საინტერესო ინფორმაციას ნახავს მკითხველი მშვიდობის პარკების თაობაზე, რომლებიც ემსახურება მსოფლიოს ქვეყნებს შორის თანამშრომლობას, საერთო ინტერესებისთვის ერთობლივი ქმედებას და მდგრადი მშვიდობის დამყარებას.
ჟურნალის წინა ნომერში მკითხველი გაეცნო ჯანმრთელობის ხელშემწყობი სკოლების ქსელს. ამ სტატიის გაგრძელებაში კი საუბარია ჯანმრთელობის წიგნიერებაზე, რომლის განვითარება დამოკიდებულია მთელი რიგი სასიცოცხლო უნარების განვითარებაზე. სტატიაში მოყვანილია აქტივობების მაგალითები მასწავლებლებისთვის.
კიბერუსაფრთხოება მიჩნეულია გლობალიზაციის ერთ-ერთ მთავარ საფრთხედ უახლოესი 10 წლისთვის. ამიტომ ჟურნალის ყველა ნომერში შეხვდებით სტატიებს ამ თემაზე. წინამდებარე ნომერშიც გთავაზობთ ორ სტატიას, რომელთაგან ერთში მოცემულია რეკომენდაციები, თუ როგორი პაროლები უნდა შექმნას მომხმარებელმა, რომ არ გახდეს კიბერშეტევის მსხვერპლი, ხოლო მეორეში მკითხველი გაეცნობა ახალ, საფრთხის შემცველ პროგრამულ უზრუნველყოფას და რეკომენდაციებს მისგან თავის დასაცავად.
