განათლების E სახლი

იხილეთ სრული ვერსია

ავტორები:
ხათუნა მჭედლიშვილი, მაკა ნადარეიშვილი, ნინო ფეტვიაშვილი, გია ბაღაშვილი, რუსუდან თაყაიშვილი, ირინა ჯორჯაძე. თათია ბარბაქაძე, ლევან ახვლედიანი

მოკლე აღწერა:

თქვენ წინაშეა ჟურნალის – „ჰუმანიტარული განათლება სკოლაში“ – მორიგი ნომრის მეორე ნაწილი – უცხო ენები, მუსიკა და ხელოვნება,ისტორია – თქვენთვის უკვე კარგად ნაცნობი ავტორებითა და აქტუალური თემებით.ჟურნალში შეხვდებით საინტერესო მოსაზრებებს ნეიროლინგვისტიკის ნიშვნელობაზე უცხო ენების სწავლებისათვის, ამ სფეროს მეცნიერთა კვლევის შედეგებით ამყარებულ მსჯელობას რამდენიმე აქტიური მეთოდის გამოყენების ეფექტიანობაზე.მოსწავლეთა შეფასება ისევ რჩება მასწავლებელთა დიდი ნაწილის აქილევსის ქუსლად,ამიტომ მოწინავე საერთაშორისო ამოცდილების მიმოხილვა ამ მიმართულებით დააინტერესებს არამარტო უცხო ენების, არამედ სხვა საგნების მასწავლებლებსაც. ჩვენი ჟურნალის ავტორები ექსპერტობასთან ერთად მასწავლებლებიც არიან და მათი გამოცდილება ემყარება, ერთი მხრივ, სწავლებისა და სწავლის თეორიებს, მეორე მხრივ, მათ პედაგოგიურ მიგნებებს, ამიტომ, ვფიქრობთ, ინტერკულტურული სამაგიდო თამაშებისა და ინტეგრირებული გაკვეთილის მაგალითები კარგ იმპულსს მისცემს მასწავლებლებს საინტერესო იდეების საკლასო სივრცეში გადატანისათვის ისევე, როგორც საქართველოს სხვადასხვა კუთხეში მომუშავე ენთუზიასტი მუსიკოსების საქმიანობა.ქართული მუსიკალური ფოლკლორი ჩვენი უდიდესი მონაპოვარი და ერის სავიზიტო ბარათია. ქართული მუსიკალური ფოლკლორის ერთი მნიშვნელოვანი, მრავლისმეტყველი თავისებურების – პოლისტადიურობის – განხილვა ესთეტიკურ ჭრილში, ვფიქრობ, მნიშვნელოვან ინფორმაციას მიაწვდის მუსიკის პედაგოგებს და არა მარტო. ჩვენი ჟურნალის ფურცლებიდან შესაძლებლობა მოგვეცა გია ბაღაშვილის თბილი წერილით მიგველოცა 85 წლის იუბილე მურმან შათირიშვილისათვის, რომლის მიერ შესრულებული იმერული ჰანგები ფართო საზოგადოებამ რამდენიმე წლის წინათ მოისმინა და უმალ გამოარჩია თვითმყოფადი ჟღერადობით, ორიგინალური ტემბრითა და შესრულების მანერით.ერთი მხრივ, მეცნიერული თეორიები, მეორე მხრივ, თეორიებზე დაფუძნებული წარმატებული პრაქტიკა – ეს არის ის, რასაც ჟურნალის ამ ნომერში ნახავს მკითხველი.