ვიდეო რესურსების კატეგორიაში კი წარმოდგენილია გადაცემებში ნაჩვენები სიუჟეტები, რომლებიც კინოს სხვადასხვა ჟანრსა და თემას შეეხება. სიუჟეტები საბაზო საფეხურისთვისაა განკუთვნილი. მასწავლებელს მათი გამოყენება გაკვეთილის მიზნიდან გამომდინარე შეუძლია. 

სიუჟეტი დოკუმენტური კინოს მნიშვნელობას შეეხება. კინემატოგრაფის ისტორია დოკუმენტური ფილმით დაიწყო. ამიტომაც გასაკვირი არაა, რომ პირველი ქართული სრულმეტრაჟიანი ფილმიც, “აკაკის მოგზაურობა, დოკუმენტური კინოსურათი იყო.  სიუჟეტში რესპონდენტი საუბრისას ყურადღებას ამახვილებს საბჭოთა პერიოდის დოკუმენტალისტიკაზე. ის აღნიშნავს, რომ საბჭოთა დროში დოკუმენტურ კინოს პროპაგანდა-აგიტაციის მიზნით იყენებდნენ. საბჭოთა კავშირის დაშლის შემდეგ კი ქართული კინო ბევრი სხვადასხვა გამოწვევის წინაშე აღმოჩნდა. 

რესურსის პრაქტიკული დანიშნულება: რესურსი განკუთვნილია საბაზო საფეხურის მოსწავლეებისთვის. მასწავლებელს სიუჟეტის ჩვენება  შეუძლია მაშინ, როდესაც გაკვეთილის თემა დოკუმენტურ კინოს შეეხება. მნიშვნელოვანია, რომ გაკვეთილის მსვლელობისას მთავარი აქცენტი დოკუმენტური კინოს ღირებულებაზე, სირთულესა და თანამედროვე გამოწვევებზე გაკეთდეს.