ვიდეო რესურსების კატეგორიაში კი წარმოდგენილია გადაცემებში ნაჩვენები სიუჟეტები, რომლებიც კინოს სხვადასხვა ჟანრსა და თემას შეეხება. სიუჟეტები საბაზო საფეხურისთვისაა განკუთვნილი. მასწავლებელს მათი გამოყენება გაკვეთილის მიზნიდან გამომდინარე შეუძლია. 

სიუჟეტი კინოში ალეგორიის მხატვრული ხერხის გამოყენებას ეხება. რესპონდენტი კინომცოდნე, ლელა ოჩიაური ალეგორიის ხერხის თავისებურებასა და გამოხატვის ფორმებზე საუბრობს. რესპონდენტი ყურადღებას ამახვილებს საქართველოს უახლეს ისტორიაზე, რა დროსაც რეჟისორები საკუთარი სათქმელის მაყურებლამდე მიტანას ფილმებში ალეგორიის ხერხის გამოყენებით ცდილობდნენ. ლელა ოჩიაური ასევე საუბრობს ქართული კინოს ალეგორიულ ენასა და საბჭოთა იდეოლოგიის დაპირისპირებაზე. 

რესურსის პრაქტიკული დანიშნულება: რესურსი განკუთვნილია საბაზო საფეხურის მოსწავლეებისთვის. მასწავლებელს სიუჟეტის ჩვენება  შეუძლია მაშინ, როდესაც გაკვეთილის თემა საბჭოთა იდეოლოგიას, კინოცენზურასა და ალეგორიის კინოენას შეეხება. სიუჟეტის გამოყენება შესაძლებელია საგანთაშორისი ინტეგრაციის დროს. ისტორიასთან ინტეგრირებული გაკვეთილის ჩატარებისას მნიშვნელოვანია, რომ გაკვეთილის მთავარი აქცენტი საბჭოთა წარსულზე,  ალეგორიის ხერხის გამოყენებით შექმნილ მხატვრულ ფორმებსა და მაყურებლის აღქმაზე გაკეთდეს.