საკითხავი მასალა
წარმოგიდგენთ ჟურნალ „განათლება გლობალური მოქალაქეობისთვის“ მორიგ
ნომერს. მასში თქვენ გაეცნობით საკითხებსა და ხედვებს, რომლებიც დღეს აქტუალურია მსოფლიოში.
ვფიქრობთ, საინტერესო იქნება ლიბერალური დემოკრატიის ძირითადი პრინციპებისა და ახალი აღთქმის მოძღვრებაში მათი შესაძლო წინაპირობების ურთიერთკავშირში გააზრების მცდელობის გაცნობა.
დღეს, როდესაც საქართველოში შემუშავდა ზოგადი განათლების ახალი ეროვნული მიზნები, მკითხველს ვთავაზობთ ზოგადი განათლების ეროვნული მიზნების, მათი დანერგვისა და განხორციელების თავისებურებებს მსოფლიოს სხვადასხვა ქვეყანაში.
მსოფლიო ეკონომიკური ფორუმის გლობალური რისკების 2024 წლის ანგარიშში ერთ- ერთ მთავარ საფრთხედ განიხილება კლიმატის ცვლილება. მნიშვნელოვანია ამ საფრთხის გააზრება ყველა დონეზე. კლიმატის ცვლილების შერბილება არაერთი თაობის გამოწვევა იქნება. ამიტომ არის კლიმატის ცვლილების დაძლევა მდგრადი განვითარების ერთ-ერთი მიზანი. ამაზე მუშაობს სხვადასხვა საერთაშორისო ორგანიზაცია, შემუშავებულია სხვადასხვა პროგრამული დოკუმენტი. მკითხველი გაეცნობა ამ დოკუმენტებს, ორგანიზაციებს და მათ მიერ გადადგმულ ნაბიჯებს.
განუზომელია საინფორმაციო ტექნოლოგიების და, კერძოდ, ინტერნეტის როლი დღევანდელ მსოფლიოში. ინტერნეტის მდგრადობას, გამძლეობას, უსაფრთხოებას, სტაბილურობას და განვითარებას განსაკუთრებული მნიშვნელობა აქვს მომხმარებლებისთვის. ინტერნეტი და, ზოგადად, კიბერსივრცე დადგა ახალი საფრთხის წინაშე, რაც უკავშირდება ცალკეული ავტოკრატული ხელისუფლებების მხრიდან მასზე ტოტალური კონტროლის დაწესებას, გლობალურად არსებულ ეთნო კონფლიქტებსა და საომარ მოქმედებებს. ვფიქრობთ, ეს საკითხები ბევრ მკითხველს დააინტერესებს.
ჟურნალში განთავსებულ სტატიაში მკითხველი გაეცნობა Chat-ზე დაფუძნებულ ხელოვნური ინტელექტის ინსტრუმენტებს, მითითებებს მათი გამოყენებისთვის.
ციფრული ტექნოლოგიების რუბრიკის ქვეშ, აგრეთვე, მოცემულია ინფორმაცია NFT ტექნოლოგიასა და მის შესაძლებლობებზე.
ჯანმრთელობა ადამიანის კეთილდღეობის ერთ-ერთი უმნიშვნელოვანესი კომპონენტია. დღეს, როდესაც ადამიანს უამრავი საფრთხე ელის, ჯანმრთელობა და ჯანსაღი ცხოვრების წესი სერიოზული საზრუნავია. ამას ემსახურება ჯანმრთელობის მსოფლიო ორგანიზაციის ევროპის რეგიონული ოფისის მხარდაჭერით შექმნილი ჯანმრთელობის ხელშემწყობი სკოლების ქსელი (SHE – Schools for Health in Europe Network Foundation). მკითხველი მიიღებს ინფორმაციას ამ სკოლების მუშაობის პრინციპებსა და გამოცდილებაზე. მკითხველი, ასევე, გაეცნობა დიდი სპორტული წარმატებების გავლენას მოზარდებზე.
