საკითხავი მასალა
თქვენ წინაშეა ჟურნალის – „ჰუმანიტარული განათლება სკოლაში“ – მორიგი
ნომერი, რომელშიც ისევ ვაგრძელებთ საუბრებს ქართული ენისა და ლიტერატურის მასწავლებლებისათვის
(და არამარტო) საინტერესო საკითხებზე. რატომ უჭირთ მოსწავლეებს წაკითხულის გაგება?
– ეს არის ის კითხვა, რომელზედაც პასუხის მოძებნა მთელი მსოფლიოს საგანმანათლებლო
სისტემის უპირველესი გამოწვევაა. წაკითხულის გაგების უნარის შემსწავლელი თეორიების
მიმოხილვა და საერთაშორისო გამოცდილება, თუ რა შეიძლება გაკეთდეს ამ მიმართულებით,
ვფიქრობთ, ყველა საგნის მასწავლებელს დააინტერესებს, რადგან წაკითხულის გაგება ის
საბაზისო უნარია, რომელიც ცხოვრებაში ადამიანის წარმატების წინაპირობად არის აღიარებული.
ლიტერატურა ინტერპრეტაციული ხელოვნებაა, ამიტომ რუბრიკა „თვალსაწიერში“ ჩვენ ისევ და ისევ შემოგთავაზებთ თქვენთვის კარგად ცნობილი ნაწარმოებების ახლებურად დანახულ წახნაგებს გია მურღულიას, ლევან ბრეგაძის, ლევან ბებურიშვილის, ლალი დათაშვილისა და მედეა ღლონტის წერილებით.
უნდა იყოს თუ არა ჩვენში ლიტერატურის სწავლება დისტანცირებული პოლიტიკური აქცენტებისაგან? უნდა შევთავაზოთ თუ არა მოსწავლეებს პოლიტიკური რომანებიდან თუნდაც მცირე ამონარიდები იმისათვის, რომ უკვე სკოლადამთავრებული, სოციალური თვალსაზრისით უკვე შემდგარი, სხვათა თანასწორი მოქალაქე ელემენტარულ ინფორმაცის ფლობდეს წარსულის, აწმყოს ან მომავლის რეალური გამოწვევების შესახებ? – ეს ის შეკითხვებია, რომლებზედაც პასუხის ცდაა ზაალ ჩხეიძის წერილი.
ფილოლოგთა წრეებისათვის ცნობილია, რომ ეტაპობრივად მიმდინარეობს ქართული სალიტერატურო ენის ნორმებისა და ტერმინოლოგიური სტანდარტების სრული კორპუსის მომზადება. ჟურნალში მოგაწვდით ინფორმაციას როგორც განახლებული, ისე სრულიად ახალი სალიტერატურო ნორმების შესახებ.
დაბოლოს, ჟურნალი გვერდს ვერ აუვლიდა გურამ რჩეულიშვილის საიუბილეო თარიღს. იმაზე, თუ რა გამოარჩევს გურამ რჩეულიშვილის პროზას, გვესაუბრება თავის წერილში მაია ჯალიაშვილი.
