საკითხავი მასალა
ჟურნალის
– „ჰუმანიტარული განათლება სკოლაში“ – მეორე ნაწილი ეთმობა ენებს, ესთეტიკური ციკლის საგნებსა და ისტორიას.
ენების სწავლება და სწავლა პრიორიტეტულ მნიშვნელობას იძენს მთელ მსოფლიოში და ამ საკითხზე
საუბარს დღეს, გლობალიზაციის ეპოქაში, ვერ ერთი ჟურნალი ვერ აუვლის გვერდს.
ჟურნალში, გარდა მსოფლიო ენობრივი პოლიტიკისა, წარმოგიდგენთ საქართველოში ეროვნულ უმცირესობათა ენების სწავლებასთან დაკავშირებულ პრობლემებს. ერთ-ერთი სტატია სწორედ უმცირესობათა ენის ეფექტიანი სწავლების გზას გვთავაზობს: ციფრული ინსტრუმენტების დანერგვას საქართველოს საგანმანათლებლო პლატფორმაზე, თუმცა საკითხი აქტუალურია ყველა სასწავლო საგნისათვის, რადგან გამოცდილება, რომელიც ამ სტატიაშია აღწერილი, პანდემიის პირობებში დაგროვდა. გვერდს ვერ ავუვლიდით უცხოეთის გამოცდილებასაც. წინამდებარე ნომერში გერმანიაში არსებულ წიგნიერებასთან დაკავშირებულ პრობლემასა და ქვეყანაში ამ პრობლემის გადაჭრის გზების ძიების შესახებაც გიამბობთ. ყველა ქართველისათვის ერთნაირად მნიშვნელოვანია ეროვნული საუნჯე - ჩვენი ფოლკლორი, რომელსაც ჟურნალში ვრცელი სტატია ეთმობა, მაგრამ, ვფიქრობთ, არც უცხოეთში მოღვაწე ჩვენი თანამედროვე ხელოვანების შემოქმედება იქნება უინტერესო მკითხველისათვის. ზოგადად, ჰუმანიტარული განათლება წარმოუდგენელია ესთეტიკური ციკლის საგნების გარეშე, ამიტომაც არის ის ასე „მსუყედ“ წარმოდგენილი ჟურნალში. ასევე, ვფიქრობთ, მკითხველისათვის საინტერესო იქნება საბჭოთა პერიოდის ისტორიის სახელმძღვანელოების მიმოხილვა ერთი კონკრეტული ასპექტით - რა ადგილი ეთმობოდა მათში არქეოლოგიას და რა გავლენა ჰქონდა იდეოლოგიას ამ საკითხების გაშუქებაზე სახელმძღვანელოებში.
