საკითხავი მასალა
საინფორმაციო
ტექნოლოგიებმა, ინტერნეტიზაციამ რადიკალურად შეცვალა სამყარო, გლობალურ-ვირტუალურ სივრცედ
გადააქცია ის. კაცობრიობა ახალი გამოწვევის წინაშე დადგა: თუ ინფორმაციულ საზოგადოებაზე
გადასვლას თან არ ახლავს ზოგადკაცობრიული ღირებულებების ერთგული პიროვნება, რომელიც
ფართო სოციალური ხედვითა და მორალურ-ეთიკური პრინციპებით გამოირჩევა, იქმნება ადამიანების
ვიწრო ტექნოკრატ სპეციალისტებად გადაქცევის საშიშროება. ასეთ პირობებში განსაკუთრებულ
მნიშვნელობას იძენს ჰუმანიტარული განათლება. ეთიკურ და ზნეობრივ ღირებულებებს, კაცობრიულ
და ეროვნულ კულტურას მომავალი თაობა ჰუმანიტარული ციკლის საგნების და, უპირველეს ყოვლისა,
ქართული ენისა და ლიტერატურის მასწავლებლებმა უნდა აზიარონ. მასწავლებელთა პროფესიული
განვითარების ეროვნული ცენტრის ინიციატივა, გამოსცეს ჟურნალი „ჰუმანიტარული განათლება
სკოლაში“, უპირველეს ყოვლისა, მასწავლებელთა პროფესიულ განვითარებას
ისახავს მიზნად.
ჟურნალი ორი ნაწილისაგან შედგება.
მნიშვნელოვნებიდან გამომდინარე, პირველი ნაწილი ქართულ ენასა და ლიტერატურას ეთმობა.
მასში წარმოდგენილია ლიტერატურულ წრეებში ცნობილი ადამიანების - ლევან
ბრეგაძის, თამაზ ვასაძის, გია მურღულიას, ნინო ნაკუდაშვილის, ზაალ ჩხეიძის, მაია ნინიძისა
და სხვათა წერილები. ვფიქრობთ, მკითხველს დააინტერესებს მათი შეხედულებები ლიტერატურის
სწავლებასა და, ზოგადად, ჰუმანიტარული განათლების აქტუალური საკითხებზე.
